لو زهقت من Postman ؟ جرّب Hoppscotch!
لو اشتغلت قبل كده على APIs، أكيد سمعت عن Postman. هو من أشهر الأدوات اللي بنستخدمها عشان نجرّب ونتأكد من الـ APIs اللي بنبنيها شغالة صح. بس Postman بقى تقيل، وبيدفعك فلوس على حاجات ممكن تكون محتاجها ببلاش. وهنا بييجي Hoppscotch.
يعتبر Hoppscotch بديل مفتوح المصدر ومجاني تمامًا بدا كمشروع بسيط اسمه Postwoman وسهل تشتغل عليه سواء من المتصفح أو حتى تنزله Self-host على جهازك أو سيرفرك الخاص، عشان تحافظ على بياناتك وتشتغل براحتك.
مميزات Hoppscotch
- سهل وسريع وخفيف على الجهاز
الواجهة بتاعته بسيطة ومش بتلغبط، بتحط الـ URL، تختار الميثود (GET, POST, DELETE...)، وتبعت الريكوست، وتبدأ تتابع الرد بسهولة.
- بيشتغل Offline
على عكس Postman اللي لازم تكون متصل بالنت حتى لو بتختبر API انت لسه بتطوره علي جهازك local . Hoppscotch ممكن تشتغل عليه أوفلاين كأنه PWA (Progressive Web App)، يعني تفتحه من المتصفح وتشتغل بدون نت.
- تقدر تشغله Self-Hosted
ودي من أهم النقط، تقدر تنزّل Hoppscotch عندك على سيرفر أو جهازك، وتتحكم فيه ١٠٠٪. ده مفيد جدًا للشركات أو المشاريع اللي عندها بيانات حساسة ومش حابة تشتغل على أدوات سحابية.
- يدعم بروتوكولات مختلفة
مش بس REST، Hoppscotch بيدعم كمان GraphQL و WebSocket و MQTT و Socket.IO… لو بتشتغل على تطبيق فيه real-time communication، هتحتاج الحاجات دي.
- يتيح لك كتابة Tests و Scripts
لو محتاج تتأكد إن الـ API بترجع نفس الداتا اللي متوقعها، أو تكتب أكواد JavaScript بسيطة قبل الريكوست – Hoppscotch بيسهّل ده وبيوفر لك code snippets تساعدك تكتب بسرعة.
- يقدم خاصية ال History
كل request بتبعته بيتسجّل في التاريخ، فتقدر ترجع له في أي وقت، وتشوف الرد اللي جالك، من غير ما تبعت من جديد.
- Environments و Collections
زي Postman بالظبط، تقدر تحط متغيرات عامة (زي الـ token أو الـ baseURL)، وتستخدمها في أكتر من ريكوست، وكمان تنظم الريكوستات في Collections عشان تشتغل بطريقة مرتبة.
- يسهل التعاون بين الفريق ببلاش
في Postman لو عايز تضيف أكتر من ٣ أشخاص لازم تدفع. في Hoppscotch، الكل يشتغل مع بعض ببلاش! وتقدر تعمل workspaces خاصة وتحدد مين يعمل إيه جوه الفريق.
- Hoppscotch CLI
لو بتحب تشتغل من الTerminal ، فيه CLI خاص بـ Hoppscotch تقدر تستخدمه عشان تجرّب الريكوستات، أو تعمل export/ import للـ collections بسهولة.
- مفتوح المصدر وبيكبر بسرعة
الميزة الكبيرة كمان إنه Open Source، يعني المجتمع كله بيطوّره، وبيتحسن بسرعة. لو عندك فكرة أو مشكلة، ممكن تفتح issue على GitHub، أو تتابع الناس على Discord.
في الختام
لو انت مطور بتشتغل على APIs كتير، وعايز أداة خفيفة وسريعة وتتحكم فيها براحتك، Hoppscotch اختيار ممتاز. هو مش بس بديل مجاني لـ Postman، لكنه كمان بيديّك حرية أكتر، وبيشتغل في أي بيئة، سواء عندك أو على الكلاود.
لو عايز تبدأ، ممكن تدخل على hoppscotch.io وتبدأ فورًا، أو تنزله على جهازك وتستمتع بالـ Self-Hosting.