كمبرمج واعد بدأت تشتغل على مشروع بسيط وجربت تشغله واشتغل، دلوقتي أنت عايز تكبر المشروع وتخلي مبرمجين تانين يشاركوا فيه، هيقابلك هنا مشكلتين:
- هتتشاركوا الكود مع بعض إزاي؟ ولما حد يعدل هنشوف تعديلاته إزاي؟
- لو حصل تعديلات كبيرة، وطلع فيها مشكلة.. إزاي هترجع لما قبل التعديلات دي؟
بداية الـ Version Control
وعشان نحل المشكلتين دول المبرمجين اخترعوا فكرة “إدارة النُسخ” واللي بيها بتحتفظ بنسخة من البرنامج وتضيف الكود الجديد عليها وتشوف بيشتغل ولا لأ:
- اشتغل؟ خير وبركة وكدا ندمجه مع النسخة الأساسية للكود.
- مشتغلش؟ متقلقش، النسخة القديمة موجودة وتقدر ترجع لها.
أشهر نظام لإدارة النُسخ هو Git وأكيد سمعت عنه ولكن في أنظمة تانية كتير..
طيب تعمل إيه لو حبيت تكبّر الفريق وتخلي مبرمجين تانين يشاركوا في كتابة كود البرنامج؟
Version Control in Cloud
هتضيف نسخة البرنامج بتاعك على خدمة استضافة للمشاريع علي ال Cloud واللي من أشهرها GitHub، وأي حد حابب يشارك في كتابة الكود، هياخد نسخة من المشروع ويعدل عليها على جهازه الشخصي وبعدين يرفع التغييرات على GitHub عشان يشاركها معاكم وبعد مراجعتها تقدروا تضيفوها لنسخة المشروع الرئيسية.
مميزات الـ Version Control
- بتحتفظ بكل التعديلات كاملة ومين صاحب التعديل ده.
- بتسمحلنا نرجع لإصدارات قديمة من المشروع لو كان في مشكلة في الإصدار الحالي.
- بتسهل التعاون بين المبرمجين بأدوات كتيرة زي خاصية المراجعة والتعليق على الأكواد.
ازاي نستخدم الـ Version Control
- بنفهم إزاي النظام ده بيحتفظ بالنسخ المختلفة.
- بنستخدم أوامر بسيطة للتحكم في العملية دي.
نظم إدارة النسخ “جوكر” في حياتك كمبرمج ولا غنى عنها فبنشجعكم على فهمها بشكل عميق.